ಪ್ರಪಂಚದ ಸಮಾಜ ಸುಧಾರಕರಲ್ಲಿ ಡಾ. ಬಾಬಾ ಸಹೇಬ ಅಂಬೇಡ್ಕರರು ಅಂಗ್ರ ಪಂಕ್ತಿಯಲ್ಲಿ ನಿಲ್ಲುವ ನಾಯಕ. ಇವರು ತಾವು ಮಾಡಿದಂತಹ ಹಲವಾರು ಸುಧಾರಣೆಗಳಿಂದ ಹೆಸರುವಾಸಿಯಾಗಿದ್ದಾರೆ, ಅದರಲ್ಲಿಯೂ ಭಾರತೀಯ ಇತಿಹಾಸದಲ್ಲಿ ಯಾರು ಮಾಡದೇ ಇರುವ, ಅಸ್ಪೃಶ್ಯರಿಗಾಗಿ ಮಾಡಿದಂತಹ ಹೋರಾಟ ಸ್ಮರಣಿಯವಾದದ್ದು. ಹಿಂದೂ ಸಮಾಜವು ಸಾವಿರಾರು ವರ್ಷಗಳಿಂದ ಮನುವು ಹಾಕಿಕೊಟ್ಟಂತಹ ನಿಯಮಗಳನ್ನು ತೊರೆಯದೇ ಅವುಗಳನ್ನು ಚಾಚು ತಪ್ಪದೇ ಪಾಲಿಸಿಕೊಂಡು ಬರುತ್ತಿತ್ತು. ಅದರಲ್ಲಿಯೂ ಪ್ರಮುಖವಾಗಿ ಹಿಂದೂ ಸಮಾಜದ ಸವರ್ಣಿಯರ ದಬ್ಬಾಳಿಕೆಯಿಂದ, ಶೋಷಣೆಯಿಂದ ಹೀನವಾದ ಕಾರ್ಯಗಳನ್ನು ಮಾಡಿಕೊಂಡು, ಪ್ರಾಣಿ-ಪಕ್ಷಿಗಳಿಗಿಂತ ಕಡೆಯಾದ ಜೀವನ ಮತ್ತು ಸಮಾಜದ ಎಲ್ಲಾ ಸೌಲಭ್ಯಗಳಿಂದ ವಂಚಿತರಾಗಿ ಗುಲಾಮರಂತೆ ಬದುಕುತ್ತೀದ್ದ ಅಸ್ಪೃಶ್ಯ ವರ್ಗವು ಒಂದಾಗಿತ್ತು. ಈ ಅಸ್ಪೃಶ್ಯ ವರ್ಗಕ್ಕೆ ಡಾ. ಬಾಬಾ ಸಾಹೇಬರು ನಾಯಕರಾಗುವುದಕ್ಕಿಂತ ಮುಂಚೆ ಈ ವರ್ಗಕ್ಕೆ ನಾಯಕರು ಇರಲಿಲ್ಲ, ಇವರ ಕುಂದು ಕೊರತೆಗಳನ್ನು, ಬೇಕು-ಬೇಡುಗಳನ್ನು ಮತ್ತು ಇವರಿಗೂ ಸಾಮಾಜಿಕ ನ್ಯಾಯ ಬೇಕು, ಸಾಮಾಜಿಕ ಹಕ್ಕುಗಳು ಬೇಕು ಎಂಬುದನ್ನು ವಿಚಾರ ಮಾಡುವ ವ್ಯಕ್ತಿಗಳು ಇರಲಿಲ್ಲ. ಆದರೆ ಅದೇ ಜಾತಿಯಲ್ಲಿ ಹುಟ್ಟಿದ ಬಾಬಾ ಸಾಹೇಬರು ಅಸ್ಪೃಶ್ಯರಿಗೆ ಆಗುವ ಅನ್ಯಾಯಗಳನ್ನು ಅನುಭವಿಸಿ, ಗಮನಿಸಿ ಇದು ಹಿಂದೂ ಸಮಾಜದಲ್ಲಿರುವ ಅನಿಷ್ಟ ಪದ್ದತಿಯೆಂದು ತಿಳಿದು, ಇದನ್ನು ಸರಿಪಡಿಸಲೇಬೇಕು ಎಂದು ಹಠ ತೊಟ್ಟು ಇವರ ನಾಯಕತ್ವವನ್ನು ವಹಿಸಿಕೊಂಡು ಸಮಾಜದಲ್ಲಿಯ ಯಾವುದೇ ಜನಾಂಗ, ನಾಯಕರಿಗೆ & ಅಧಿಕಾರಕ್ಕೆ ಅಂಜದೇ ದಲಿತರಿಗೂ ಸಾಮಾಜಿಕ ಹಕ್ಕುಗಳಿವೆ, ಅವರಿಗು ಸಾಮಾಜಿಕ ನ್ಯಾಯ ಬೇಕು, ಅವರು ಸಮಾಜದಲ್ಲಿ ಎಲ್ಲ ವರ್ಗದವರೊಂದಿಗೆ ಸಮನಾಗಿ ಬಾಳಬೇಕು ಎಂಬ ಚಿಂತನೆಯಿಂದ ಹಲವಾರು ಸಾಮಾಜಿಕ ಹೋರಾಟಗಳನ್ನು, ಚಳುವಳಿಗಳನ್ನು ಮಾಡಿ ಅಸ್ಪೃಶ್ಯರಿಗೆ ಸಾಮಾಜಿಕ ನ್ಯಾಯವನ್ನು ಒದಗಿಸಿಕೊಡುವಲ್ಲಿ ಮಹತ್ವದ ಪಾತ್ರವನ್ನು ವಹಿಸಿದರು.